«Ийэ5э махтал» айар киэһээ үрдүк таһымҥа ааста
Алтынньы 29 кунугэр Оҕо айымньытын дыбарыаһыгар, Этнокултуура киинин үөрэнээччилэрин уонна төрөппүттэрин көҕүлээһиннэринэн, «Ийэ5э махтал» айар киэһээ үрдүк таһымҥа ааста. Бу күн 70 оҕо бэйэтин талаанын, дьоҕурун Дыбарыас баараҕай саалатыгар толору мустубут көрөөччү киэҥ дьүүлүгэр таһаарда. Кинилэр истэригэр 9-с республикатааҕы Олонхо курэҕин Гран-При хаһаайына Марк Данилов (салайааччы Н.И. Мордовская), «Сир симэ5э» Саха республикатын оҕо көрдөрүүлээх үҥкүү ансаамбыла (сал.З.Г.Ксенофонтова, М.А.Брызгалова, Т.М. Гаврильева), «Саһарҕа», «Дьулусхан» фольклорнай бөлөх ( сал. Л.В. Кучутова, М.М. Петрова), «Этигэн хомус» Саха республикатын оҕо көрдөрүүлээх ансаамбыла (сал. А.С.Жиркова), «Тыыннаах тыл» литературнай уһуйаан (сал. Л.С. Яковлева), «Айгылаана» оҕо вокальнай ансаамбыла (сал. А.В.Суздалова) уо.д.а. дьон болҕомтотун тартылар, сүргэтин көтөхтүлэр.
Оҕолор уран тарбахтарынан оҥорбут араас дьэрэкээн оҥоһуктара выставкаҕа турдулар (сал. В.А.Бубякина, Л.А. Яковлева, М.П. Попова, Т.О. Гермогенова, А.И.Климова, Д.И. Романова), саха оҕото барыга бары дьоҕурдааҕын, кыахтааҕын өссө төгүл дакаастаатылар. Үгүс болҕомтону төрөппүт уонна оҕо биир ситимнээхтик үлэлиир мода студиятын (сал.Габышева Л.В.) көрөөччү сэргээтэ.
Соһуччу бэлэҕинэн Саха республикатын үтүөлээх артыыһа Анатолий Бурнашев, Саха республикатын культуратын туйгуна Мирослав Егоров ыллаан-туойан ааспыттара буолла. Республика бастыҥ ырыаһыттара бу күн сценаҕа төрөппүт быһыытынан таҕыстылар, Дыбарыас үлэтин-хамнаһын үрдүктүк сыаналыылларын бар дьон иннигэр эппиттэрэ- уһуйааччылар сүргэлэрин көтөхтө, өссө таһаарыылаахтык үлэлииргэ кынаттаата.
Киэһээни «Тыыннаах тыл» уһуйаан салайааччыта Л.С.Яковлева, «Саха” көрдөрөр-иһитиннэрэр хампаанньа ыытааччы Влад Давыдов иилээн-саҕалаан ыыттылар.
Ийэ күнүгэр истиҥ киэһээ тэриллибититтэн бары да астынан, оҕо талааныттан сөҕөн-махтайан, уһуйааччылар сыралаах үлэлэрин сыаналаан тарҕастыбыт.
Оҕо айымньытын дыбарыаһа
